Keppnisskrá þríþrautafélaganna 2010

25. febr Inniþríþraut í World Class.
Syntir 600 metrar og hlaupnir 5 km á bretti.

18. apríl 2þraut Heiðmörk 4/15/4
4 km hlaup/15 hjól/ 4 km hjól.

9. maí Kópavogsspretturinn 0,4/10/2,5
400 metra sund, 10 km hjól, 2,5 hlaup.

6 júní. Ólympísk þraut í Hfj.
1500 m. sund í Ásvallalaug, 40 km hjól á KV, 10 km hlaup á KV. Hugsanlega verður hálf ólympísk þraut haldin um leið.

11 júlí ½ Járnkarl Hafnaf 1,9/90/21,1
Þetta er aðalþraut ársins. 1900 metra sund í Ásvallalaug, 90 km hjólreiðar á KV og 21.1 km hlaup við KV. Aðeins fyrir vel þjálfað fólk.

Í ágúst. Ólympísk þraut á Laug/Húsavík
Sömu vegalengdir og hér fyrir ofan nema hvað hvíld er milli sunds og hjóls.

Fyrsta helgi í sept Vasa2000 Bo/Ís 700 m sund í Bolungavíkurlaug, 17 km hjól til Ísafjarðar og hlaupnir svo 7 km á Ísafirði.

17 okt Tvíþraut Heiðmörk
Sömu vegalengdir og hér að ofan.

Ódagsettar:

Marbendillinn 2010 í Nauthólsvík.
1500 m sjósund og hlaupnir 5 km eftir það á Ægisíðu.
Sennilega haldin á fögru sumarkvöldi í júlí.

Nánari upplýsingar verða birtar hér á síðunni þegar fram líða stundir. Byrjendum er bent á stuttu þrautirnar sem henta öllum. Best er auðvitað að vera með í öllum!
Fyrirspurnir má senda á netfangið gisli (hja) internet.is

Einn lítri á klukkutíma!

Gunnlaugur Júlíusson lýsir 100 km hlaupi sínu á bretti í skemmtilegri færslu og fróðlegri. Heitt var í salnum í WC, 23 stiga hiti, og þurfti Gunnlaugur því að drekka mikið, eða um lítra á hverjum klukkutíma. Nánar í færslu hans um hlaupið.

Inniþríþraut fyrir vestan

Vestfirðingar héldu inniþríþraut um helgina og voru þátttakendur í yngri kantinum eins og sjá má a vefsíðu keppninnar, http://tri.blogcentral.is/. Mjór er mikils vísir og þarna eru framtíðarkappar á ferð.

100 kílómetrar á hlaupabretti!

Gunnlaugur Júlíusson er staddur í World Class í Laugardalnum og ætlar að hlaupa 100 km á bretti í þágu góðs málefnis og vekja um leið athygli á bók sinni. Velunnarar Grensásdeildarinnar eru hvattir til að kaupa bókina beint af höfundi til að deildin fái sem mest í sinn hlut. Ef Gunnlaugur lýkur þessu hlaupi er það Íslandsmet.
Vitað er að margir innipúkar nota brettið fyrir langa hlaupið á laugardegi og þrauka þá 30 km. Einn hefur hlaupið heilt maraþon á bretti og þá á 3 og hálfum tíma. Það þætti gott utanhúss.
Sjá nánar hér: http://www.mbl.is/mm/frettir/innlent/2009/12/05/gunnlaugur_hleypur_til_gods/

Þríþrautasamband Íslands

Á aðalfundi ÞRÍR í gærkvöldi var samþykkt að hefja undirbúning að stofnun þríþrautasambands Íslands. Í stjórn þess myndu eiga sæti fulltrúar allra þríþrautafélaga á landinu. Núna eru þegar starfandi félög í Reykjavík, Hafnarfirði, Vestfjörðum og einherjar á Selfossi og víðar munu fyrr eða síðar stofna smá félag utan um sig. Ritari þessara lína mun kalla saman undirbúningsfund með fulltrúum félaga og öðrum áhugamönnum eftir áramót. Sambandið verður andlit þríþrautafólks út á við og leitast við að breiða út fagnaðarerindið í sem ríkustum mæli.
Á aðalfundinum var að öðru leyti farið yfir keppnir ársins, kynntar keppnir á komandi ári og þríþrautafólk ársins var tilkynnt. Fyrir valinu urðu María Ögn Guðmundsdóttir og Steinn Jóhannsson, sem þóttu öðrum sigursælli og fengu þau gjafabréf í Afreksvörum í Glæsibæ.
Margar keppnir eru fyrirhugaðar næsta sumar, allt frá sprettþraut í Kópavogi upp í hálfan Ironman í Hafnarfirði. Einnig verður ólympísk þraut í Hafnarfirði í samvinnu ÞRÍR og ÞRÍH. Stóra takmarkið er þó CHallenge Kaupmannahöfn 15. ágúst en þangað stefna nú 25 manns.

Chrissie Wellington

Góð umfjöllun um Chrissie Wellington í TransWorldSport

Rudy Garcia Tolson

Þegar Rudy var 12 ára heimsótti hann Ísland. Þá birtist þetta viðtal í Mbl. (mars 2001)

Rudy var fimm ára er hann missti báðar fætur um mið læri. Þrátt fyrir það keppir hann í sundi, hjólreiðum og hlaupi

ÉG vil hvetja öll fötluð börn til að taka þátt í íþróttum miðað við getu og umfram allt aldrei að gefast upp heldur láta draumana rætast,” sagði Rudy Garcia-Tolson, sem hingað er kominn frá Kaliforníu. Hann er hér í boði Össurar hf. og keppir sem gestur á Íslandsmóti fatlaðra í sundi, sem fram fer í Sundhöllinni um helgina, en hann notar vörur frá fyrirtækinu. Rudy er tólf ára og ótrúlega kraftmikill og lætur ekkert stoppa sig enda er kjörorð hans; “Hugrekki er öflugt vopn.”

Hann fæddist með sjaldgæfa erfðasjúkdóma og þegar hann var fimm ára hafði hann gengist undir 15 árangurslausar aðgerðir til að bjarga fótunum. Þrátt fyrir ungan aldur bað hann lækna um að fjarlægja fæturna því hann vildi geta hreyft sig og leikið sér eins og önnur börn og það var gert.

Ári eftir aðgerðina fór Rudy að æfa sund. Fyrst í lítilli laug en eftir því sem hann náði betri árangri færði hann sig yfir í stærri laugar og til betri félaga og um leið betri þjálfara. Hann keppir ekki eingöngu í sundi þó svo sundið sé hans uppáhald.

Sund, spretthlaup og þríþraut
Rudy keppir einnig í spretthlaupi, hjólreiðum og keppti í þríþraut í fyrsta sinn tveimur árum eftir að hann missti fæturna. Rudy sagðist hlaupa mílu (1,6 km) á 6 mín 15 sek og þrjár mílur á 22 mín. 15. sek.

Árið 1998 og 1999 tók hann þátt í landsmóti fatlaðra, sem haldið var í Minniapolis og árið 2000 keppti hann um þátttöku í Ólympíuleikum fatlaðra í Indianapolis. “Það gekk mjög vel,” sagði Rudy. “Á síðasta ári vann ég tvenn gullverðlaun og þrenn silfurverðlaun.” Samtals hefur hann unnið til tólf verðlauna, sem verður að segjast að er ansi góð frammistaða miðað við aldur.

Rudy æfir í tvær klukkustundir daglega, fimm daga vikunnar og segist ekki vera þreyttur. Hann hefur gengið í skóla í sex ár og hefur ekki misst úr einn einasta dag ef frá eru taldir fimm dagar í Chicago en þangað fór hann til að telja kjark í fötluð börn og brýna fyrir þeim að gefast ekki upp. Reyndar hefur hann ferðast um Bandaríkin þver og endilöng og rætt við nemendur um líf sitt og íþróttir en aðallega að til að telja kjark í fatlað ungt fólk. “Það er gaman í skólanum og ég vil hvetja alla til að sækja hann vel og gefast ekki upp því menntun gefur bestu möguleikana í framtíðinni,” sagði hann. “Krakkarnir líta á mig sem jafningja og enginn fer öðruvísi með mig en aðra. Ég er mjög ákveðinn og veit hvað ég vil.”

Þríþraut á Hawaii

En hver eru framtíðaráformin? “Ég hef gaman af tölvum og stefni á að verða kerfisfræðingur þegar ég verð stór,” sagði Rudy “Og svo er það þríþrautarkeppnin á Hawaii, sem er mjög erfið en ég ætla samt að reyna við og vinna. Þú verður að synda fjórar mílur í sjónum, hjóla 130 mílur og hlaupa 26,1 mílu. En ég verð að vera 18 ára til að fá að vera með.”

Rydy er mjög þakklátur þeim, sem hafa stutt hann og þá sérstaklega Össuri hf., en án stuðnings frá fyrirtækinu hefði hann ekki náð árangri í íþróttum.

Þetta er nýleg mynd af Rudy:

Hann lét drauminn rætast og tók þátt í Ironman í Kona á Havaí eins og minnst er á í þessari grein..
Því miður náði hann ekki tímamörku á hjólinu en mætir á efa að ári og reynir aftur.

Ævintýri á Grænlandi

Heimild: Mbl:23.júlí, 2007

ÆVINTÝRA- og jaðaríþróttakeppnin Suku Extreme Arctic Challenge hófst á laugardag, en þetta er í sjöunda skipti sem keppnin er haldin. Það er ekki á færi nema allra mestu hreystimenna að taka þátt, því keppnin reynir gríðarmikið á styrk og þol keppenda, en meðal keppnisgreina eru hlaup og hjólreiðar í fjalllendi, róður um langar vegalengdir á kanó, jöklaganga og fjallaklifur.

17 fjögurra manna lið hófu keppni að þessu sinni. Bretar eru fjölmennastir með 19 keppendur og næstir koma Danir með 17 keppendur. Noregur, Holland, Frakkland, Grænland, Bandaríkin, Nýja-Sjáland og Ísland eiga svo öll sína fulltrúa í keppninni.

Sex Íslendingar taka þátt í keppninni í ár. Eitt lið er algerlega skipað Íslendingum og kallar sig The Intersport Iceland. Þar fer fremstur í flokki Trausti Valdimarsson, en hann keppir nú í Grænlandsævintýrinu í þriðja sinn. Hann hefur mikla reynslu að baki sem nýtist honum í keppninni og þar má nefna að hann hefur hlaupið 50 maraþon. Félagar hans eru þeir Stefán Viðar, Ásgeir Elíasson og Gunnlaugur Júlíusson, en sá síðastnefndi hefur sérhæft sig í langhlaupum og æfir nú fyrir keppni í 240 kílómetra hlaupi.

Liðið Northern Lights er samsett af tveimur íslenskum körlum, þeim Pétri Helgasyni og Erlendi Birgissyni, og tveimur dönskum konum, Karin Moe Bojsen og Piu Anning Nielsen.

Afrekaskrá þeirra Péturs og Erlends er löng og hafa þeir meðal annars hlaupið samtals 40 maraþon. Þeir hafa báðir margoft tekið þátt í Laugavegarhlaupinu og meðal þeirra íþrótta sem þeir félagarnir leggja stund á eru klettaklifur, skíðaíþróttir og hlaup.

Í fjórða sæti eftir fyrsta daginn
Rásmerki var gefið klukkan tíu á laugardagsmorgun og byrjuðu keppendur á því að róa kanó yfir fimm kílómetra breiðan fjörð, þar sem fjallganga upp á tind Polhelm fjalls í 1000 metra hæð tók við. Þegar liðin komu niður af fjallinu var róið aftur yfir fjörðinn og í mark. Intersport-liðið endaði fyrsta daginn í fjórða sæti og fór leiðina á tímanum fjórum klukkustundum, fimm mínútum og 25 sek. Northern lights lentu í tólfta sæti og komu í mark eftir fimm klukkustundir, 16 mínútur og 33 mínútur.

Gærdagurinn strembinn
Verkefni gærdagsins var að hjóla sjö kílómetra langa og mjög ójafna braut fimm sinnum og klífa því næst þrjá fjallstinda í nágrenni Tasilaq. Að sögn aðstandenda er hjólreiðabrautin sá liður keppninnar sem tekur hvað mest á. Það boðaði ekki gott fyrir lið Intersport, enda mátu þeir það sjálfir svo að fjallahjólreiðarnar væru þeirra veikasta hlið.

Svo fór þó að lokum að þeir voru fimmta liðið í mark um hálf sjö í gærkvöld eftir níu og hálfan tíma. Northern lights voru ekki komin á leiðarenda klukkan rúmlega níu, en þá voru níu af liðunum 17 komin aftur til Kulusuk.

Í dag keppa liðin í boðhjólreiðum og göngu á jökli og er lagt af stað klukkan níu að morgni. Eftir daginn í dag verða ákveðin kaflaskil í keppninni, því venjan er að fyrstu þrjá dagana fái liðin verkefni sem hægt er að ljúka á einum degi eða minna, en fjórða og síðasta áskorunin getur tekið hátt í tvo sólarhringa og er þá lítið sofið.

Um tíma var útlit fyrir að fresta þyrfti keppninni vegna þess að fjallahjól og annar búnaður sumra keppenda tafðist á Reykjavíkurflugvelli. Það tókst þó á endanum að bjarga málum með því að útvega björgunarvesti, blautbúninga og annan nauðsynlegan útbúnað frá heimamönnum í Tasilaq, svo keppnin gat hafist á laugardagsmorgun eins og gert var ráð fyrir.
Í hnotskurn
» Keppendur klifra, hjóla, ganga og róa samtals um 250 kílómetra á fimm dögum. Stór hluti leiðarinnar liggur yfir brattar fjallshlíðar, stórgrýti og jökla.
» Mikið er lagt upp úr öryggi þátttakenda í keppninni. Þannig er klukkan stoppuð á meðan klifrað er síðustu metrana upp á varasama fjallstinda. Keppendur fá þá einnig svolitla stund til þess að njóta útsýnisins

Einar og Havaí

Mbl: 18.júlí, 1996

ÞRÍÞRAUTARKAPPINN Einar Jóhannsson gerði það gott um helgina í undankeppni fyrir hina svokölluðu Iron-man þríþrautarkeppni, sem haldin verður á Hawai síðar á þessu ári.

Keppnin fór fram í Roth í Þýskalandi og gerði Einar sér lítið fyrir og tryggði sér sæti í aðalkeppninni á Hawai, lenti í 13. sæti í sínum aldursflokki og 115. sæti í heildina. “Ég er mjög sáttur við árangurinn þó að ég hefði að vísu viljað hlaupa á aðeins betri tíma. Það var erfitt að venjast hitanum á þessum stutta tíma, sem ég var í Þýskalandi en samt bætti ég mig um 21 mínútu frá því í fyrra. Ég er búinn að skrá mig til keppni á Hawai en hvort ég tek svo þátt í henni verður fjárhagurinn síðar á árinu að skera úr um,” sagði Einar í samtali við Morgunblaðið í gær.

Keppendur voru 2.450 í undankeppninni í Þýskalandi en alls er talið að um 20.000 manns muni bítast um þau 1.500 sæti, sem í boði eru á Hawai. Keppt er í 3,8 kílómetra sundi, 180 kílómetra hljólreiðum og 42,2 kílómetra maraþonhlaupi og var tími Einars um helgina 9 klukkustundir, 24 mínútur og 53 sekúndur.

Þoli ekki að tapa

Viðtal við Karenu í Mbl: Ágúst 2008

„Þoli ekki að tapa“
Keppnismanneskja Karen Axelsdóttir fór ekki að æfa þríþrautina fyrr en eftir þrítugt.
[ Smelltu til að sjá stærri mynd ]

Þegar Íslandsmeistarinn í hjólreiðum, Karen Axelsdóttir, ákvað að byrja að stunda þríþraut fyrir rúmum tveimur árum hafði hún lítinn grun um að hún ætti eftir að standa á verðlaunapalli á heimsmeistaramóti áhugamanna sem bronshafi í greininni rúmu ári síðar.

Svitastorknar runnu þær í mark reiðhjólakempurnar á Íslandsmótinu í hjólreiðum sem fram fór á dögunum. Í kvennaflokki sigraði Karen Axelsdóttir með yfirburðum en sennilega vita ekki allir að sú sama hampaði í fyrra bronsverðlaunapeningi á heimsmeistaramótinu í þríþraut. Og þó eru ekki nema tvö ár frá því hún fékk fyrst pata af greininni, þá 31 árs að aldri.

„Ég var stödd í boði í maí 2006 þar sem vinur minn sagði mér frá því að hann væri búinn að skrá sig í keppni í þríþraut í Jersey fimm mánuðum síðar,“ segir Karen þegar hún er spurð hvað leiddi hana út í þríþrautina. „Ég var eins og aðrir að leita að einhverri tilbreytingu frá ræktinni svo ég ákvað að slá til. Til að hætta ekki við daginn eftir fór ég strax út í búð og keypti mér byrjendapakka sem kostaði um 140 þúsund íslenskar krónur og þá varð ekki aftur snúið!“

Keppti fyrir Bretland
Karen er búsett í London en hún er viðskiptafræðingur að mennt og lauk síðastliðinn vetur meistaragráðu í mannauðsstjórnun. „Ég æfði frjálsar íþróttir alltaf af og til þar til ég varð 16 ára en stundaði íþróttina fremur illa þótt mér tækist oftast að troða mér á verðlaunapalla. Svo gerði ég ekkert í meira en tíu ár og eignaðist tvö börn en ákvað þá að koma mér aftur í form. Það endaði með því að ég tók einkaþjálfarapróf meðan ég var í fæðingarorlofi. Áður en ég byrjaði í þríþrautinni var ég því í góðu líkamsræktarformi en engu hlaupaformi.“

Viðbrigðin voru því töluverð því þríþrautin er sett saman úr sundi, hjólreiðum og hlaupum – greinum sem allar krefjast töluverðs úthalds. Sjö vikum eftir að Karen keypti búnaðinn keppti hún engu að síður á sínu fyrsta þríþrautarmóti í styttri þraut (400 m sund, 10 km hjól og 5 km hlaup) og varð efst af 202 keppendum. Það varð til þess að hún ákvað að stefna á gott sæti í Jersey þar sem hún keppti í ólympískri þríþraut og sigraði. Þá varð ekki aftur snúið. „Breska þríþrautarsambandið hafði þá samband við mig svo þetta vatt upp á sig og ég fór að berjast um sæti í breska liðinu fyrir heimsmeistaramótið í Hamborg.“

Karen hafði reyndar hug á að keppa þar fyrir Íslands hönd en þar sem íslensk þríþrautarfélög eru ekki skráð hjá alþjóðaþríþrautarsambandinu gekk það ekki eftir. Það var þó meira en að segja það að komast í breska liðið. „Í raun komast bara fjórir efstu af um 1.100 keppendum á fjórum úrtökumótum í liðið en þetta hafðist á endanum hjá mér.“

Brjálæðislega gott form
Í Hamborg keppti Karen í sprint-flokki, þ.e. hálfri ólympískri vegalengd, og vann sem fyrr segir brons í sínum aldursflokki. „Við það fór að rigna yfir mig tilboðum, m.a. frá þjálfurum sem vildu taka mig að sér svo í rauninni lá beinast við að ég færi í atvinnumennsku. Ég er hins vegar með tvö börn og fjölskyldu og var því ekki til í að taka næsta skref enda krefst atvinnumennskan mikilla ferðalaga og jafnvel búsetu þar sem veðurfar er hentugra fyrir æfingar.“

Í staðinn hefur Karen ákveðið að leggja bankastarfið sem hún sinnti áður á hilluna og snúa sér alfarið að því að þjálfa aðra samhliða eigin þjálfun en hún stefnir á að ná góðum árangri fyrir heimsmeistaramótið í Ástralíu á næsta ári. Púslið með fjölskyldu og starf er ærið því Karen æfir sjálf tvisvar á dag, sex daga vikunnar og þarf þrisvar í viku að vakna klukkan hálfsex til að mæta á sundæfingar. Það þarf ansi mikinn vilja í slíkt svo það liggur beinast við að spyrja hvað sé eiginlega svona grípandi við þetta sport?

„Maður kemst í svo brjálæðislega gott form,“ segir Karen og hlær. „Það er ótrúlega gaman að geta hlaupið upp á Esjuna hvenær sem er. Þegar maður er búinn að kynnast því að vera í svona ástandi er mjög erfitt að fara til baka.“

Hún segir stuðning annarra einnig skipta miklu máli. „Ég á mjög skilningsríkan eiginmann sem stendur alltaf við bakið á mér en stuðningur heima fyrir er að mínu mati lykilatriði fyrir keppnisfólk.

Svo er fólkið í þessu almennt kraftmikið og með mikla ævintýraþrá og hvetur mann óspart áfram. Þríþrautin er líka svo fjölbreytt – þegar maður er orðinn leiður á að synda skiptir maður yfir í hjólið eða hlaupin.“

Hún viðurkennir fúslega að vera mikil keppnismanneskja. „Að sjálfsögðu – ég er með óbilandi keppnisskap í þessu. Og ef ég veit að ég er góð í einhverju, þá þoli ég ekki að tapa.“

Mismunandi lengd þríþrautar
Þríþraut getur verið mislöng. Svokölluð ólympísk þríþraut er sett saman úr 1.500 metra sundi, 40 kílómetra hjólreiðum og 10 kílómetra hlaupi en nafnið er dregið af því að í henni er keppt á ólympíuleikum. „Svo er hægt að reyna sig á hálfólympískri þríþraut, sem kallast sprint, en í henni eru allar vegalengdirnar styttar um helming. Frægastur er hins vegar Járnkarlinn (Iron man) sem allt þetta er sprottið af en þá synda menn 3,8 kílómetra, hjóla 180 kílómetra og hlaupa maraþon eftir það,“ segir Karen.